كلاي BBJ يرد على متهميه بالتحرّش و الاغتصاب

نشرت الناشطة اسماء ثابت مساء الاثنين 13 جويلية تدوينة على صفحتها الرسميّة كشفت فيها عن ضحيّة اغتصاب من طرف مغني الراب كلاي ببج و في ما يلي نص التدوينة :

اليوم في جروب انا زادة ..ضحية اغتصاب من طرف كلاي بيبي جي والمنتج نتاعو في نفس الوقت …حكات اللي صارلها…
الضحية خدمتلو مونتاج احد الكليبات وعطات تفاصيل على الحادثة وعلى العمل اللي جمعها بيهم …
في انتظار شهادات ضحايا اخرين لنفس الاشخاص…

و في سياق متصل نشرت الناشطة الحقوقية جيهان عثمان تدوينة قالت انها منقولة من مجموعة « انا زادة » المخصصة لضحايا التحرش الجنسي في تونس و تتضمن التدوينة تفاصيل الواقعة التي حدثت في افريل 2017 حسب رواية الضحيّة و في ما يلي نص التدوينة :

هذي حكاية هبطت قبيلة في قروب #ena_zeda
الغناية الي تحكي عليها غناية كلاي بيبي جي أعطيني جونتة نومي

« سلام، اول حاجة حاجة قبل ما نبدا نحكي نحب نوضح اللي هذا « faux profil » بش لا العايلة ولا الأصدقاء يتعرفو عليا.
الحكاية هذي من 2017 و اليوم اول مرة بش نحكيها بعد ما ريت الناس لكل تبرتاجي في حاجات صارتلهم.
الحكاية بدات في افريل 2017. انا نعمل « montage video » و خدمت لبرشا عباد معروفين يوتوبرز او فنانين، جاني نهار صديق عرض عليا خدمة بش نعمل مونتاج لكليب متاع رابور معروف في تونس « مزلت نخمم نقول إسمو ولا لا » فسرلي التفاصيل و العرض المادي كان باهي برشا و مانجمتش نرفض، مشيت معاه للستيديو وين كان متواجد هالرابور و اللي انا شخصيا مانحبوش اما الخدمة تقعد خدمة و عادي تخدم مع عباد ماتتفاهمش معاهم. حكينا و فهموني شنوا يحبو يعملو بالضبط و كانت حاجة مقدور عليها فوافقت، و مع العلم إنو الرابور هذا طيلة الجلسة يغزرلي درا كيفاه.. هيا تقابلنا برشا مرات و في غضون شهرين كان كل شي حاضر، و الكليب لقا نجاح كبير برشا. فكلمني الصديق اللي جابلي الخدمة قالي رانا الكل بش نعملو لمة في دار ال »producer » نحتفلو بنجاح الكليب، اول حاجة سألتو علاها شكون بش يكون متواجد، قالي فلان و فلان و معاهم الرابور بالطبيعة و الحاجة اللي طمنتني ولو قليلا هو وجود بنات اخرين و خاصة الصديق هذا اللي نوعا ما عندي ثقة فيه و قرينا مع بعضنا في الفاك.. مشيت لدار السيد في حلق الواد، حسيت روحي من اول القعدة على اعصابي و مانيش مرتاحة جملة، مكانش فمة إحترام بين العباد و ما كان فمة شي يقرب للإحترافية و هذا بخلاف انواع المخدرات اللي كانت موجودة « مانيش ضد اللي يتكيفو زطلة و انا مالعباد اللي تنادي بعدم تجريم المستهلك » و بالطبيعة نشرب كي غيري مالناس، لكن الليلة هذيكا قررت مانشربش بحكم القعدة كانت خامجة و مع عباد مانعرفهمش كيما يلزم، قعدنا قرابة الساعتين و بعد قام الصديق اللي معايا و 3 بنات قالو نمشيو نجيبو ماكلة و ما ناقصنا و نجيو، معناها بش نقعد انا و الرابور و البروديوسر، قمت قلتلهم هيا خلي نمشي انا عندي خدمة الصباح، غزرلي الرابور قالي لا استنا فلانة بش نعطيك فلوسك، قتلو ديجا حاضرين ؟ خاطر كنا متفاهمين مزالو ايامات، قالي اي اي حاضرين ستنا شويا.. هيا خرجو الجماعة و انا مشيت مع السيد للبيت بش نحكيو و يعطيني فلوسي، احنا دخلنا للبيت دار سكر الباب غزرت قتلو خلي خلي محلول الدنيا سخونة، و على دورتي تجيني ضربة على راسي طحت بالوقت و ما فقت كان بجسد هالحيوان فوقي، عريانة و هو عريان.. مكانتش عندي الطاقة بش نصيح، حبيت نعيط لل » » بش يعاوني فما راعني إلا إنو السيد شادد كاميرا و يصور فيا، حسيت روحي بلعت لساني، تقطع عليا النفس و نحب نبكي مشمنجمة، نغزر ايمين و ايسار نحب نقول لروحي نحلم اما لا مانيش نحلم، تداولو الزوز على إغتصابي بكل وحشية و حتى شرجيا. مانعرش قداه قعدت العملية لكني حسيتها دهر تهدى مش سويعات، نكتب توا و قلبي يدق بالقوي و النفس سخون و دمعتي على عيني كاينها صارت البارح حتى بعد 3 سنين.. بعد ما كملو، فقدت إحساس الحركة ببدني، قعدت علا بلاصتي ماتحركتش، شدوني من شعري و قالولي تحل فمك بحرف الفيديو يهبط و العالم لكل يشوفك يا ملهط و بزقو على وجهي و خرجو، ل ست دبشي بالسيف و خرجت نتظاهر إنو ماصار شيئ سلمت عالصديق و خرجت نجري. مانجمتش نشكي تعرفوش علاش ؟ ساهل بش نشكي و نحشيه في الحبس، اما ساهل بش امي و بابا يخسرو حياتهم، انا اصيلة ولاية المهدية، و حومتنا الكل تعرف بعضها و مزال عندهم معتقدات كيما الشرف و العار، بباببا و امي متأكدة مايعملولي شيئ اما يقتلو رواحهم حاجة متأكدة منها، خويا كان يقتل الزوز مغتصبين متأكدة، كنت بش نكون سبب في دمار عايلتي، الخو فالحبس و الوالدين ميتين و اختي يتيمة و منعوتة بالصبع في الليسي. فإخترت نسكت و نبلع السكينة بدمها، و لليوم نهلوس و يجيوني كوابيس و نعاود نستحضر المشهد، قعدت ايامات مانجمش ندخل للتوالات كي العباد، مانجمش نقعد على كرسي، إلتهابات و وجايع في بدني و في قلبي.. الرابور هذا مزال يخدم و ماشي و يطلع و مالتوب 5 في تونس و عندو قاعدة جماهرية كبيرة. نتمنى نقتلو نتمنى نقضي عليهم الزوز نتمنى ناخو حقي نتمنى اللي صار عليا يصير عليه. »

و نشر مغني الراب كلاي بيبي جي فيديو على صفحته الرسمية نفى فيها الاتهامات الموجهة اليه حيث اكد انه سيقاضي كل من تعمد تشويهه حسب قوله

كلاي BBJ يرد على متهميه بالتحرّش

كلاي BBJ يرد على متهميه بالتحرّش#3oumBa7rek ☀️🌊

Publiée par Mosaïque FM sur Mardi 14 juillet 2020

2 0
Happy
Happy
100 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %